ភ្នំពេញ៖ ពិធីជួបជុំរវាងនាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងអ្នកសារព័ត៌មាន នឹងត្រូវរៀបចំឡើងវិញនៅថ្ងៃទី១៤ ខែមករា ឆ្នាំ២០២៣ ខាងមុខ។ នេះបើតាមការចុះផ្សាយរបស់អគ្គនាយកដ្ឋានទូរទស្សន៍ជាតិកម្ពុជា។

បើតាមទទក នៅព្រឹកនេះរដ្ឋមន្ត្រីព័ត៌មានលោក ខៀវ កាញារីទ្ធ បានដឹកនាំកិច្ចប្រជុំមួយស្ដីពីការបង្កើតគណៈកម្មការរៀបចំពិធីដែលធ្វើឡើងបន្ទាប់ពី រាជរដ្ឋាភិបាល ឯកភាពឱ្យក្រសួងព័ត៌មាន រៀបចំពិធីជួបជុំរវាង សម្តេចតេជោ ហ៊ុន សែន ជាមួយអ្នកសារព័ត៌មានដោយផ្ទាល់លើកទី៥ ឆ្នាំ២០២៣ ដើម្បីសំណេះសំណាល និងពិសាអាហារល្ងាច នៅមជ្ឈមណ្ឌលសន្និបាត កោះពេជ្រ នាថ្ងៃសៅរ៍ ទី១៤ ខែមករា ឆ្នាំ២០២៣។

បើតាមទទក មានអ្នកចូលរួមជាថ្នាក់ដឹកនាំក្រសួង ស្ថាប័ន ដែល មានភារកិច្ច សមត្ថកិច្ច ទាក់ទងវិស័យព័ត៌មាន និងសោតទស្សន៍ អភិបាលនៃគណៈអភិបាលរាជធានី-ខេត្ត អ្នកសារព័ត៌មាន ពិធីករ ពិធីការិនី របស់ស្ថានីយវិទ្យុ ទូរទស្សន៍ មន្ត្រីទទួលបន្ទុកព័ត៌មានរាជធានី ខេត្ត អ្នកនាំពាក្យក្រសួង-ស្ថាប័ន និងមន្ត្រីអង្គភាពចំណុះ ក្រសួងប្រមាណ ៥០០០ (ប្រាំពាន់) រូប ។

លោករដ្ឋមន្ត្រី ខៀវ កាញារីទ្ធ មានប្រសាសន៍បញ្ជាក់ថា៖ «នៅក្នុងពិធីជួបជុំរវាង សម្តេចអគតេជោ នាយករដ្ឋមន្រ្តី ជាមួយអ្នកសារព័ត៌មានលើកទី៥ ឆ្នាំ២០២៣ ខាងមុខនេះ គឺនៅពេលដែលសម្តេច ហ៊ុន សែន មានប្រសាសន៍ ហើយសម្រេច រឿងអ្វីមួយនោះ គឺមានតំលៃស្មើនឹងការសម្រេចពេលប្រជុំរបស់ គណៈរដ្ឋមន្រ្តី»។

លោករដ្ឋមន្ត្រីបានបញ្ជាដល់គណៈកម្មការរៀបចំពិធីចូលរួមសហការគ្នាធ្វើកិច្ចការងារនេះអោយបានល្អ ដោយក្នុងនោះ អគ្គនាយកដ្ឋានព័ត៌មាន និងសោតទស្សន៍ ត្រូវធ្វើការជួបប្រជុំជាមួយសមាគមសារព័ត៌មាន ដើម្បីប្រមូលដកស្រង់នូវមតិយោបល់ និងសំណូមពររបស់អ្នកសារព័ត៌មាន ជារួមដើម្បីដាក់ជូនទៅសម្តេចតេជោ ពិនិត្យ និងសម្រេចដោះស្រាយ ក្នុងពេលពិធីជួបជុំនោះតែម្តង៕